Shtatë ministra të jashtëm e të çështjeve europiane nga vendet anëtare të BE-së, mes tyre edhe ministri i jashtëm Grek, i kërkojnë institucioneve europiane të shpejtojnë bisedimet ndërinstitucionale që të miratojnë mekanizmin financiar të Planit të rritjes për Ballkanin Perëndimor.

I prezantuar si propozim i Komisionit europian dhe miratuar në konkluzionet 14-15 dhjetorit të kaluar plani shihet si riformatim i zgjerimit të BE-së me flexibilitete integrimi në fusha të caktuar për secilin vend që arrin disa standarde.

“Nëse zbatohet me sukses, do të kontribuojë në nxitjen e konvergjencës socio-ekonomike, duke trajtuar ikjen e trurit nga rajoni, duke sjellë përfitime të prekshme për qytetarët e saj dhe mbështetjen e rrugës së Ballkanit Perëndimor drejt anëtarësimi në BE. Udhëheqësit e Ballkanit Perëndimor, siç nënvizohet në deklaratën e tyre të përbashkët të 22 Janar 2024, kanë shprehur mbështetjen e tyre të plotë për objektivat e Planit të Rritjes dhe gatishmërinë e tyre për ta zbatuar atë.  Duhet ta shfrytëzojmë këtë mundësi”, thuhet në kërkesën e ministrave.

Por mundësia që shohin ministrat europianë është e lidhur me miratimin në Parlamentin Europian brenda këtij mandati.

“Aktualisht është duke u diskutuar rregulloja e planit të rritjes  dhe ka një mbështetje nga PE kështu që mendoj se do të kemi miratimin e saj, por ndërkohë kërkohet një ndryshim në buxhetin BE që përsëri do të vijë nga Parlamenti Europian”, u shpreh eksperti për çështjet e integrimit, Gledis Gjipali.

Parlamenti Europian pritet të jetë funksional deri në fund të muajit prill.

Gazetare: Entela Komnino

/rtsh.al/