Gjykata e Posaçme e Apelit ka ndryshuar masën e sigurisë për Embro Sulejmanin, kryekamarierin e një biznesi në Durrës, i dyshuar për përkrahjen e Ergys Agasi gjatë kohës që ky i fundit ishte në kërkim. Nga masa “arrest në burg”, gjykata ka vendosur ndaj tij “detyrim për t’u paraqitur” dhe ndalimin e daljes jashtë vendit.

Vendimi është marrë nga gjyqtari Florjan Kalaja, i cili shqyrtoi ankimin ndaj masës së sigurisë të caktuar më herët nga Gjykata e Shkallës së Parë.

Ndërkohë, Apeli ka vendosur të mos ndryshojë masën e sigurisë për Fatjon Kalluçin, shefin e Policisë Shkencore, i cili do të vijojë të qëndrojë në burg. Të dy, Kalluçi dhe Sulejmani, u arrestuan nën dyshimin se kanë ndihmuar Ergys Agasin gjatë periudhës kur ai ishte në kërkim.

Në fokus të Gjykatës së Posaçme të Apelit është edhe çështja e ish-kreut të SHISH, Vlora Hyseni. Seanca për shqyrtimin e ankimit të saj është caktuar sot në orën 13:00.

Hyseni është person nën hetim nga SPAK dhe dyshohet se ka ndihmuar biznesmenin Ergys Agasi gjatë periudhës 8 mujore që ai ishte në arrati, si dhe se i ka vënë në dispozicion sekrete shtetërore.

/rtsh.al/