Presidenti i Ukrainës, Volodymyr Zelensky ka reaguar pas takimit që zhvilloi me kreun e shtetit serb, Aleksandër Vuçiç në samitin e Ukrainës që u mbajt sot në Tiranë.

Përmes një postimi në platformën sociale ‘X’, Zelensky shkruan se ka falënderuar Serbinë për mbështetjen e sovranitetit dhe integritetit  territorial të Ukrainës si dhe për ndihmën e saj humanitare dhe mikpritjes se qytetarëve ukrainas të ikur nga lufta.

“Jam takuar me Presidentin @AVucic dhe falënderova Serbinë për mbështetjen e sovranitetit dhe integritetit territorial të Ukrainës, si dhe ndihmën e saj humanitare dhe financiare dhe mirëpritjen e ukrainasve që ikën nga lufta.

Vura re rëndësinë e pjesëmarrjes së Serbisë në zbatimin e Formulës së Paqes. Ne koordinuam kontakte të mëtejshme me synimin për të zgjeruar mbështetjen globale për Formulën.

Unë e informova presidentin Vuçiç për situatën aktuale në vijën e frontit. Ne diskutuam gjithashtu sfidat e sigurisë dhe politike në Evropën Lindore”, shkruan Zelensky.

Ndërkaq, duhet theksuar fakti që Serbia është i vetmi vend në rajon dhe Evropë që nuk ka pranuar t’i vendosë sanksione Rusisë, pas pushtimit të Ukrainës.

/rtsh.al/