Tërheqja nga Kuvendi të ligjit për Amnistinë Penale nga mazhoranca, për shkak të mungesës së 84 votave ishte tema e diskutimit sot në emisionin “3D nga Alban Dudushi”.

Kryetar i Komisionit të Sigurisë, Nasip Naço i ftuar në studio ka deklaruar se mazhoranca është e vetëdijshme që nuk i ka votat e mjaftueshme në Kuvend për të kaluar ligjin, por njëkohësisht tha ai, në dijeninë e tij mazhoranca nuk është futur në pazar me asnjë subjekt apo deputet tjetër.

“Mazhoranca që kur e ka marr këtë nismë e ka marr parasysh se duhen 3/5 e votave që të kaloj në kuvend ligjin për amnistinë. Mazhoranca nuk ka thënë asnjëherë që kemi këtë numër votash”, tha Naço.

Ndaj , theksoi ai,  duam apo s’duam ne, kemi kërkuar për të pasur një konsensus më të gjerë në lidhje me amnistinë.

“Nuk kemi kërkuar Pazar, as marrëveshje dhe as kompromis dhe t’ju japim ato që ata kanë në mendje. Nuk kam dijeni që të ketë një marrëveshje që më jepni këtë dhe tju japim atë që ata kërkojnë” thekson deputeti socialist Naço.   

/rtsh.al/