Kryeministri Edi Rama po zhvillon sot (14 shkurt) një vizitë pune në Bruksel. Gazetarja e RTSH-së, Denada Shkodrani, ka zbuluar detaje nga agjenda e Kryeministrit, ku Rama, ku është takuar me presidentin e Këshillit Europian (KiE), Sharl Mishel (Charles Michel) si dhe pritet të takohet me presidenten e KE-së, Ursula fon der Lajen (Ursula von der Leyen).

Në orën 14:00 Kryeministri Rama u prit nga Presidenti i Këshillit Europian (KiE), Sharl Mishel.

“Rreth orës 16:00, agjenda parashikon të takohet me presidenten e Komisionit Europian (KE), Ursula fon der Lajen,” u shpreh Shkodrani.

Qëllimi i kësaj vizite, thekson Shkodrani, është koordinimi i punëve të përbashkëta, por dhe përthithja e financimeve që BE do akordojë për gjashtë vendet e Ballkanit Perëndimor.

“Shqipëria pritet të përfitojë një pjesë të rëndësishme të këtyre financimeve në formë e granteve dhe kredive të buta që do të bëjnë të mundur zhvillimin e sektorëve strategjikë,” raporton gazetarja e RTSH-së.

Në Bruksel mësohet se ndodhet dhe kryeministri i sapozgjedhur i Maqedonisë së Veriut, Talat Xhaferi, dhe kryeministri i Malit të Zi, Millojko Spajiq, të cilët po ashtu do të zhvillojnë takime të nivelit të lartë.

Shqipëria dhe Maqedonia e Veriut kanë përfunduar disa nga kapitujt kryesorë të përafrimit të legjislacionit me atë europian.

/rtsh.al/