Ministri i Drejtësisë, Ulsi Manja gjatë një vizite zyrtare në Hagë ka nënshkruar dy dokumente të rëndësishme që kanë të bëjnë me “Konventën për Marrëveshjet për Zgjedhjen e Gjykatës” dhe “Protokollin për Ligjin e Zbatueshëm për Detyrimet Ushqimore”.

Të pranishëm në nënshkrimin e këtyre dy marrëveshje për Shqipërinë kanë qenë dhe z. Christophe Bernasconi, Sekretar i Përgjithshëm i Byrosë së Përhershme për të Drejtën Ndërkombëtare Private (HÇH) dhe z. Jules van Eijndhoven, MPJ Holandese.

Nënshkrimi i Konventës dhe Protokollit shihet si një mundësi që Shqipëria të forcojë legjislacionin e brendshëm në fushën e të drejtës ndërkombëtare private dhe një instrument shtesë për palët në zgjidhjen e mosmarrëveshjeve civile!

Ministri Manja pas nënshkrimit u shpreh se: “Konventa dhe Protokolli që pata nderin të nënshkruaj sot si Ministër Drejtësie në emër të shtetit shqiptar, garanton universalitetin e të drejtës ndërkombëtare në të drejtën e brendshme, forcon sigurinë juridike për biznesin në marrëdhëniet tregtare ndërkombëtare, si dhe lehtëson procesin e dhënies së vendimeve për detyrimet ushqimore, në rastet që kanë të bëjnë me fëmijët në kontekstin e marrëdhënieve familjare”!

Ministri Manja do të jetë i pranishëm në Hagë edhe ditën e nesërme, ku pritet nënshkrimi i një tjetër konvente të rëndësishme, që do të shoqërohet edhe me takime të nivelit të lartë.

/rtsh.al/