Këshilli Europian ka dënuar incidentet e fundit të dhunshme në veri të Kosovës, duke bërë thirrje për de-përshkallëzim të menjëhershëm të situatës.

KE u ka bërë thirrje Kosovës dhe Serbisë që të krijojnë kushtet për zgjedhje të parakohshme në të 4 komunat në veri, ndërsa konsideron thelbësor arritjen e dialogut të ndërmjetësuar nga BE.

“Këshilli Evropian dënon incidentet e fundit të dhunshme në veri të Kosovës dhe bën thirrje për një de-përshkallëzim të menjëhershëm të situatës, bazuar në elementet kyçe të përshkruara tashmë nga Bashkimi Evropian më 3 qershor 2023. Palët duhet të krijojnë kushtet për zgjedhje të parakohshme në të katër komunat në veri të Kosovës. Dështimi për të de-përshkallëzuar tensionet do të ketë pasoja negative. Është thelbësore që dialogu i ndërmjetësuar nga BE-ja i udhëhequr nga Përfaqësuesja e Lartë dhe zbatimi i shpejtë i Marrëveshjes në rrugën drejt normalizimit dhe Aneksit të Zbatimit të saj të vazhdojë. Kjo përfshin themelimin e Asociacionit/Bashkësisë së Komunave me Shumicë Serbe”, thuhet në deklaratë.

/rtsh.al/