Kandidati i koalicionit “Bashkë Fitojmë” për Tiranën, Belind Këlliçi ka deklaruar se do të ndërpresë pagesat për Inceneratorin e Tiranës, në rast se qytetarët do t’i besojnë votën në zgjedhjet lokale të 14 majit.

I ftuar në emisionin “Publikisht” të Blerta Tafanit në RTSH, Këlliçi e konsideroi Inceneratorin e Tiranës “fantazmë”, teksa shtoi se do të kallëzoi të gjithë personat që kanë shkelur ligjin, sipas tij, në lidhje me këtë çështje.

“Nëse në landfillin e Sharrës zbatohet kontrata për trajtimin e mbetjeve, unë do ta paguaj kontratën, por nëse nuk kryhet ky proces, unë kam të drejtën të anuloj pagesat për një shërbim që nuk më jepet. Do stopoj çdo vjedhje që i bëhet qytetarëve të Tiranës për shërbime fantazmë që nuk ekzistojnë. Është e provuar që në Sharrë kemi patur landfill në 2017 dhe kemi të njëjtin landfill edhe në 2023, diferenca është vetëm 62 mln dollarë, se ku kanë shkuar këto para i jap fjalën qytetarëve që do kem kallëzim personalisht për këdo që ka shkelur ligjin për t’i çuar para drejtësisë”, tha Këlliçi.

/rtsh.al/