Presidenti Bajram Begaj nis të mërkurën (26 prill) vizitën shtetërore në Kroaci, në kuadër të intensifikimit të partneritetit strategjik mes dy vendeve. Vizita e kreut shqiptar në Kroaci vjen me ftesë të homologut Zoran Milanoviç.

Në ditën e dytë të vizitës së tij (27 prill), presidenti Begaj do të mirëpritet sipas ceremonive të nderit dhe të mirëseardhjes, për të vijuar axhendën zyrtare të bisedimeve me homologun kroat, duke u fokusuar tek marrëdhëniet dypalëshe, bashkëpunimi rajonal, rrugëtimi evropian i Shqipërisë, si dhe zhvillimet e tjera me ndikim në çështjet e paqes dhe sigurisë. 

Po ashtu, në kuadër të kësaj vizite shtetërore, Presidenti Begaj do të pritet në takime të veçanta nga Kryeministri i Kroacisë, Andrej Plenkoviç, si dhe Kryetari i Parlamentit të Kroacisë, Gordan Jandrakoviç. Përpos tyre, kreu i shtetit do të zhvillojë edhe një takim me përfaqësues të shoqatave shqiptare. 

Të premte (28 prill), Presidenti Begaj nën shoqërimin e homologut kroat, do të vizitojë e takohet me Arbanasit e Zarës (Zadarit). Ky aktivitet përmbyll dhe vizitën shtetërore të Presidentit Begaj e delegacionit të tij në Kroaci.

/rtsh.al/