Kreu i partisë së Lirisë, Ilir Meta ka ripërsëritur akuzat në drejtim të kryeministri Edi Rama, duke e konsideruar qeverisjen e tij si “regjim”.

Nga podiumi i improvizuar në protestën e PD-së së Rithemelimit, Meta theksoi angazhimin e opozitës për të vijuar me protestat, teksa u shpreh se ata do ta rrëzojnë Ramën me “protesta dhe zgjedhje, zgjedhje dhe protesta”.

Ai u ndal edhe te procesi gjyqësor në Gjykatën e Apelit, ku pritet të vendoset në lidhje me “fatin” e vulës së Partisë Demokratike, duke pretenduar për ndikime politike në këtë proces, teksa u shpreh se Rama kërkon të marrë edhe drejtimin e partisë më të madhe opozitare në vend.

“Regjimi më i korruptuar në kontinent, regjimin që është lider vetëm për shpopullimin e vendit që ja ka kaluar edhe Bjellorusisë sa i takon mungesës së investimeve. Jemi sot këtu në vazhdim të angazhimit tonë të pathyeshëm për ta rrëzuar këtë regjim me protesta e zgjedhje, me zgjedhje e protesta.

Ky njeri me probleme të mëdha mendore, sot është në panikun e presioneve nga më mafiozet që ushtrohen nga ata mbështetjen e të cilëve e kërkoi për marrjen e të gjitha pushteteve. Pse i duhet të asgjësojë PD dhe çdo zë kritik opozitar? Që të vjedhë akoma më shumë dhe të mos japë llogari. Të gjithë sëbashku të vazhdojmë në rrugën tonë, protesta dhe zgjedhje, zgjedhje dhe protesta”, tha Meta.

/rtsh.al/