Kryeministri Edi Rama, i pranishëm në Samitin e NATO-s në Madrid, ka deklaruar se ka kërkuar që Kosova të ftohet në mekanizmin e Partneritetit për Paqe dhe se vendet që ende nuk e njohin atë, duhet të vlerësojnë qëndrimin e njehsuar me BE kundër Rusisë.  

Me një postim në Twitter, kreu i qeverisë bën me dije po ashtu edhe detaje nga biseda me Presidentin e SHBA, Joe Biden, teksa thotë se dëgjoi nga ai fjalët më të mirë për Shqipërinë dhe roli e saj në Këshillin e Sigurimit e në NATO.

Po ashtu Rama thotë se ka vlerësuar marrëveshjen e arritur mes Turqisë, Suedisë e Finlandës, duke  e konsideruar një shembull për zgjidhjen e problemeve mes aleatësh.

“SOT në NATO: Kërkova që Kosova të ftohet menjëherë në mekanizmin e Partneritetit për Paqe. Vendet që nuk e njohin ende Kosovën duhet të vlerësojnë qëndrimin e saj krejt të njehsuar me BE-në ndaj agresionit rus mbi Ukrainën – pavarësisht se Ukraina nuk e ka njohur ende Kosovën. Vlerësova marrëveshjen e arritur mes Suedisë, Finlandës dhe Turqisë, duke çmuar qasjen e drejtpërdrejtë të Presidentit Erdogan në funksion të një shqetësimi shumë serioz të shtetit turk dhe nënvizuar se kjo marrëveshje është një shembull për zgjidhjet e problemeve mes aleatësh. Dëgjova nga Presidenti Joe Biden fjalët më të mira për Shqipërinë dhe rolin e saj në Këshillin e Sigurimit e në NATO, si edhe shprehjen e dëshirës së tij për të organizuar diçka bashkërisht me rastin e 100 vjetorit të vendosjes së marrëdhënieve diplomatike të Shqipëri-SHBA”, shkruan Rama. 

Kryeministri Edi Rama ndodhet në Spanjë ku merr pjesë në punimet e Samitit të NATO-s që zhvillohet sot (29 qershor) dhe nesër (30 qershor) në Madrid. 

/rtsh.al/