Presidenti Ilir Meta nga Korça ka bërë apel për partitë politike që të zgjedhin kandidatë më integritet, pasi sipas tij 25 prilli do të jetë një referendum edhe më i rëndësishëm se ai i vitit 1994. Sipas presidentit fakti qëështë bërë një ligj për dekriminalizimin tregon se ky ka qenë një problem serioz i politikës sonë.

Meta i është përgjigjur edhe interesimit të gazetarëve lidhur me komentet e ish kryeministrit Fatos Nano, kur i faturoi presidentit 7 mëkatet e biblës.  “Zero komente për zero zero dhe të merresh me kumar dhe të citosh Biblën nuk shkon”, tha Meta, pas vizitës së tij në Myftinë e Korçës.

Presidenti i Republikës lidhur me marrëveshjen për detin është shprehur se vendi e ka një kushtetutë dhe një vendim të gjykatës kushtetuese për këtë çështje.

Sipas presidentit Meta është faji i politikës shqiptare që edhe sot jemi jashtë Europës, ndërsa tashmë është vënë në diskutim edhe e ardhmja europiane e Shqipërisë. Pikërisht për këtë Meta i ka bërë thirrje shqiptarëve që më 25 prill të votojnë për interesat e Shqipërisë, të votojnë kundër shpopullimit dhe pro të ardhmes europiane të vendit.