Presidenti serb Aleksandër Vuçiç ka shprehur shqetësimin për situatën në veri të Kosovës, për të cilën u shpreh se është i gatshëm për kompromise nëse largohen kryetarët e zgjedhur të komunave.

Ai u shpreh se Serbia ka ulur gjendjen e gatishmërisë ushtarake, ndërsa paralajmëroi se do të jenë gjithmonë gati për të ndihmuar serbët në veri.

“Ne kemi kaluar nga niveli më i lartë në një nivel pak më të ulët të gatishmërisë luftarake, por jemi gjithmonë të gatshëm të ndihmojmë popullin tonë në Kosovë”, thotë Vuçiç.

Duke iu referuar takimeve me emisarët e BE-së dhe SHBA-së, si dhe me përfaqësuesit e serbëve në Kosovë, Presidenti serb u shpreh se ka zhvilluar biseda të vështira.

“Bisedë e vështirë me të gjithë, asnjë bisedë e lehtë as me Lajçakun, kam pasur ditët e kaluara me disa përfaqësues amerikanë, me disa përfaqësues evropianë, kam folur mbrëmë me një nga përfaqësuesit më të lartë evropianë për gati një orë në telefon nga ora 11:00. deri në mesnatë. Situata po ndërlikohet, më shqetëson shumë”, tha Vuçiç.

Presidenti tha se ditën e sotme (13 qershor) do të publikohen raportet e Përfaqësuesit Special të BE-së për dialogun ndërmjet Beogradit dhe Prishtinës, Miroslav Lajçak dhe Përfaqësuesit të Lartë të Bashkimit Evropian për Politikë të Jashtme dhe Siguri, Josep Borell.

Ai u shpreh se masat e ndryshme që do të merren, do të kenë ndikim të fortë.

Vuçiç vuri theksin te ruajtja e paqes dhe stabilitetit, por u shpreh se Serbia nuk do të shkelë interesat kombëtare.

“Unë dua që ai të mos ketë kurrë histori lufte. Ne duhet të ruajmë paqen dhe stabilitetin, pothuajse me çdo kusht, por jo të shkelim interesat jetike kombëtare dhe shtetërore,” tha presidenti.

Ndalur te statuti i ZSO-së, Vuçiç deklaroi se askush nuk mund ta bëjë Statutin e Bashkimit të Komunave Serbe përveç ekipit menaxhues serb.

“Ne nuk kemi çfarë të negociojmë. Na jepni vetëm parimet, organet dhe organet e ZSO-së ashtu siç i kemi vënë unë dhe Isa Mustafa inicialet në vitin 2015. Ne nuk po kërkojmë asgjë më shumë. Vetëm na shkruani dhe do të jemi I kënaqur. A e dini kur do të jetë? Kurrë. Sigurisht që jo derisa është Kurti në pushtet, nuk u shkon mendja. Dhe ajo që do të ndodhë ndërkohë është ajo që me të vërtetë më shqetëson”, tha Vuçiç.

/rtsh.al/