Njohësit e politikës dhe procesit të dialogut në Kosovë thonë se zbatimi i marrëveshjes së Ohrit do të ketë zvarritje. Sipas tyre, zvarritja varet nga presioni i Bashkimit Evropian dhe Shteteve të Bashkuara të Amerikës

Tetë ditë pas dakordimit në Ohër për aneksin e implementimit të marrëveshjes bazë për normalizimin e marrëdhënieve Kosovë-Serbi, palët ende nuk kanë nisur hapat konkretë për zbatim të ujdisë, përkundër disa afateve të caktuara në aneks.

Problematike për shtyrje të mëtejshme të zbatimit të marrëveshjes po konsiderohen pika 7 për Kosovën, ku flitet për vetëmenaxhim të komunitetit serb apo Asociacionin dhe pika katër për Serbinë, në të cilën potencohet mospengesa e saj për anëtarësim të Kosovës në organizata ndërkombëtare.

Se mund të ketë vonesa në implementim të marrëveshjes e thotë edhe Arbër Fetahu nga Grupi për Studime Juridike dhe Politike.

Në anën tjetër, në partinë opozitare, Xhafer Tahiri nga Lidhja Demokratike e Kosovës e akuzon kryeministrin, Albin Kurti se po krijon terren për një pushtet të tretë për serbët e Kosovës në bazë të nenit shtatë të marrëveshjes bazë. 

Gjatë kësaj jave, krerët institucionalë në Kosovë akuzuan Serbinë që nuk po respekton obligimet e marra nga marrëveshja bazë me 27 shkurt në Bruksel dhe nga aneksi i zatimit më 18 mars, duke iu referuar deklaratave të presidentit serb, Aleksandar Vuçiç se nuk do të lejojnë anëtarësimin e Kosovës në OKB.

Mirëpo, zëdhënësi për Politikë të Jashtme dhe Siguri i Bashkimit Europian, Peter Stano bëri të ditur të dielën se institucionet e BE-së do të iniciojnë procesin për operacionalizimin e hapave të parë të fazës së zbatimit të Marrëveshjes së Ohrit së bashku me Kosovën e Serbinë.

/rtsh/

Gazetare: Teuta Shamku