Presidenti i Kinës, Shi Xhinping (o. Xi Jinping), nis të martën vizitën dyditore në Serbi, ndalesa e dytë e turit të tij europian.

Vizita vjen teksa më 7 maj, Serbia kujton 25-vjetorin e bombardimit të ambasadës kineze nga NATO – kur mbetën të vrarë tre shtetas të Kinës – në vazhdën e operacionit për të ndalur ndërhyrjen luftarake të vendit në Kosovë.

“Besoj se vizita do të jetë në interesin e qytetarëve kinezë dhe serbë,” deklaroi kreu i shtetit serb, Aleksandar Vuçiq (o. Vucic), për mediet kineze.

Në qendër të bisedimeve pritet të jenë zhvillimet globale, por edhe problemet lokale. Gjashtë muaj më parë dy vendet firmosën edhe Marrëveshjen për Tregti të Lirë, e cila do të hyjë në fuqi më 1 korrik.

Gjatë vizitës dyditore, presidenti Shi do të shoqërohet nga një delegacion prej 400 pjesëtarësh.

Kryeshtetari i Kinës vjen në Serbi pasi më herët takoi presidentin Emanuel Makron në Francë dhe do e mbyllë në Hungari turin e tij të parë europian në këto pesë vite. /AP, RTS

/rtsh.al/