Antea Kaloshi dhe Eduart Luka janë pjesë e gjeneratës së re të veterinerëve në Shkodër. Antea, vetëm 24 vjeç. Menjëherë pas përfundimit të shkollës së lartë u bë pjesë e autoritetit të veterinarisë dhe mbrojtjes së bimëve.

“Kur fillova mjekësinë veterinare, i kam shumë pasion kafshët dhe arsyeja pse unë u regjistrova në shkollën e mjekësisë veterinare është se doja të isha sa më afër kafshëve që kishin nevojë për ndihmë”, tha mjekja veterinere Antea Kaloshi.

Për Antean është tejet e rëndësishme që të duash kafshët. Pasi vetëm në këtë mënyrë mund tu shërbesh atyre. Të jesh veteriner konsiderohet si profesion mashkullor, por vitet e fundit qasja ka ndryshuar. Një ditë ajo synon të ketë klinikën e saj.

Mjeku veteriner Eduart Luka po ashtu jeton dhe punon në zonën e Bushatit. Profesioni i mjekut veterinar do e shoqërojë gjithmonë.

“Duke parë punën, duke parë të ardhurat ekonomike që të ofron ky profesion këto vitet e fundit e kam hequr nga mendja largimin nga vendi”, tha Eduarti.

Me punën dhe përkushtimin e tyre Antea dhe Eduarti synojnë të bëhen shembull për të rinjtë në mbar vendin.

/RTSH/