Punimet për ndërtimin e molit tek ura e vjetër e Bunës po vijon me ritme të shpejta. Ky investim pritet të ketë impakt të dukshëm jo vetëm në lundrimin e Bunës dhe liqenit të Shkodrës por edhe në turizëm.

Aktualisht po punohet në ndërtimin e mureve ku parashikohet që të ankorohen edhe mjetet e vogla lundruese, ndërsa një investim të tillë e vlerësojnë edhe qytetarët.

“Investim i domosdoshëm, shumë mirë që po bëhet, po zbatohet projekti dhe duket shumë bukur. Investimet sjellin turizmin, zhvillimin”, shprehet qytetarët.

Në lidhje me punimet që po realizohen inxhinieri i këtij kantieri, Elvedin Hyseni dha më shumë detaje.

“Për momentin jemi tek faza ku po punohet në ndërtimin e mureve të molit, faza e dytë do të jetë vendosja e platformës së aluminit e cila lëviz me nivelin e ujit. Kemi pasur pak problematika pasi ka lëvizje të nivelit të ujit në mënyrë të papritur, por për momentin jemi mirë dhe po ecim me ritme të shpejta”, u shpreh Hyseni.

Pjesë e rikualifikimit të molit është edhe rikonstruksioni i ujësjellësit të Zogajve.

Finanacues i këtij projekti është Qeveria Shqiptare ndërsa po zbatohet nga Fondi Shqiptar i Zhvillimit. Ky investim, që kap vlerën e rreth 1.2 milion eurove, pritet të ndikojë në zhvillimin e turizmit në Shkodër.

Gazetar: L. Kadija 

/rtsh.al/