Spitalin Pediatrik në QSUT është pajisur më disa aparatura të reja të teknologjisë së lartë. 
Sipas autoriteteve të shëndetesisë falë këtyre aparaturave bio-mjekësore do të rritet cilësia e shërbimit për pacientët e vegjël.

“Eshtë një prej investimeve që i bashkohet tashmë të gjithë investimeve të Spitalit Pediatrik, për të forcuar një prej shërbimeve më të rëndësishme, që është shërbimi i imazherisë në këtë spital. Me këtë skaner të ri, që i shtohet flotës së pajisjeve bio-mjekësore të Spitalit Pediatrik, ne do të kemi mundësi që të ofrojmë një shërbim më të shpejtë, më cilësor për pacientët e vegjël që marrin shërbim dhe kujdes shëndetësor në këtë spital”,- tha ministrja Ogerta Manastirliu. 

Sipas mjekëve, aparaturat kanë një rrezatim më të vogël për femijët, për më shumë cilësi dhe siguri për shëndetin e pacientëve të vegjël. Ky investim në Spitalin Pediatrik vjen pas investimit madhor të ndërtimit të spitalit të ri të Urgjencës, Terapisë Intensive dhe Kirurgjisë Infantile, i cili po pasohet nga faza e dytë e investimit në korpusin pediatrik.

/ rtsh /