U mbollën para dy vitesh e u rritën me përkujdesje të madhe, por sot nuk janë më. Pesë pemë  bliri  janë gjendur përtokë, mëngjesin e djeshëm, në oborrin e Gjimnazit Gjuhësor “Pandeli Sotiri” në Gjirokastër. Masakra e njerëzve të papërgjegjshëm ka nisur herët në ambientet e jashtme të kësaj shkolle, ku përherë janë shënuar ngjarje të tilla edhe pse përdoren nga qytetarët për të kaluar orët e pasdites. Të gjitha nismat dhe përpjekjet e stafit të mësuesve e nxënësve për të krijuar mjedise çlodhëse e me gjelbërim kanë shkuar dëm.

“Dëshiroj të ndaj me ju shqetësimin tim personal dhe gjithë stafit të Gjimnazit Gjuhësor “Pandeli Sotiri” në lidhje me mjedisin rrethues, mjedisin e përbashkët me komunitetin përreth. Para dy vitesh ish prefekti Astrit Aliaj, me nismën e tij vullnetare, mbolli pemë në oborrin e kësaj shkolle. Prej atij momenti ne jemi kujdesur shumë për mirëmbajtjen e tyre, por fatkeqësisht ditën e djeshme i kemi gjetur të thyera të gjitha. I bëj thirrje komunitetit të jetë më i përgjegjshëm, sepse është mjedis dhe i tyre, ku kalojnë pasditen. T’i edukojnë fëmijët e tyre me ndjenjën e së bukurës, me ndjenjën e ruajtjes së pronës, të ruajtjes së mjedisit. Është një mjedis funksional për të gjithë dhe të gjithë duhet ta mbrojmë atë.”- thotë Matilda Gushi drejtoresha e shkollës.

“Jemi kujdesur gjithë këto vite të kemi një ambient të pastër e të gjelbëruar, duke marrë nisma për pastrimin dhe mbjelljen e pemëve, por shohim se njerëzit janë të papërgjegjshëm. Nuk e kuptoj se si e shkatërrojnë vendin që e përdorin për t’u argëtuar.”- thotë Anisa, nxënëse e klasës së 8.

“Akoma nuk është kuptuar rëndësia që ka gjelbërimi dhe ambient i pastër për shëndetin tonë. Është e dhimbshme të vish e të gjesh pemët të shkatërruara nga dora e njeriut. Asnjë e tillë s’ka mbetur edhe pse kemi mbjellë shumë.” – shprehet Maria, nxënëse e klasës së 9.