Pas 5 sezoneve dhe 1 titulli të fituar por pothuajse asnjëherë titullar në radhët e Partizanit e me ndalesën Bylis sezonin e fundit, portieri Aldo Teqja nis një aventurë të re në Vlorë me skuadrën e Flamurtarit. Kur mendohej se 28-vjeçari mund të përfundonte në Shkodër ku kërkojnë gjithashtu një portier, klubi bregdetar prezantoi gardianin e ri.

Teqja që e ka nisur karrierën te Anorthosis, u aktivizua për tre sezone te Skënderbeu dhe më pas mbërriti në kryeqytet, siguron kështu një vend titullari në skuadrën kuqezi që këtë merkato ka bërë revolucionin e radhës duke larguar pothuajse gjithë skuadrën e sezonit të kaluar, për të rinisur gjithçka nga e para.

Një tjetër lojtar i importuar nga Superioreja për të cilin kanë pasur të gjithë pritshmëri të mëdha, Flamurtari e ka transferuar nga Tirana një javë më parë. Elvi Berisha u bashkua me vlonjatët ashtu si edhe mbrojtësi i Kukësit, Antonio Ilieski.

Sulmi është fuqizuar gjithashtu edhe me mbërritjen e shkodranit Silvio Zogaj që sezonin e fundit u aktivizua në radhët e Kastriotit, ndërsa trajner i skuadrës vlonjate do të jetë beratasi Emiljano Çela i cili ka lënë gjurmë në Superiore në stolin e Kastriotit.