Drejtuesi Politik i Partisë Socialiste për Diasporën, Taulant Balla, me anë të një video në rrjete sociale u bëri thirrje bashkatdhetarëve tanë që jetojnë në Itali që të shfrytëzojnë kohën e mbetur dhe të dorëzojnë zarfat e votimit me postë drejt Komisionit Qendror të Zgjedhjeve.

Pak orë para mbylljes së votimit në Diasporë, Balla, shprehet se, “Motra dhe vëllezër shqiptarë të Italisë, edhe pak orë na ndajnë nga mbyllja përfundimtare e mundësisë për të dërguar fletën e votimit drejt Shqipërisë përmes zarfit në zyrat e DHL kudo në Itali.”

Në këtë kontekst ai u bëri apel bashkatdhetarëve të shfrytëzojnë orët e mbetura për të plotësuar këtë proces.

“Ju lutem, shpejtoni dhe pak orë që ka mbetur brenda ditës së sotme, sepse është afati i fundit që mund ta plotësoni detyrën tuaj ndaj atdheut, duke votuar në zgjedhjet e 11 majit. Shkoni në çdo zyrë të DHL-së pranë banesës tuaj dhe nisni zarfin për Shqipëri. Sepse kjo është një votë historike për Shqipërinë anëtare të Bashkimit Europian”, përfundoi Balla.

/rtsh.al/