Tirana do të jetë më 16 maj 2025 mikpritëse e Samitit të Komunitetit Politik Evropian, një ngjarje historike që pritet të mbledhë liderët e vendeve evropiane dhe të theksojë rëndësinë e Shqipërisë si një partner strategjik për stabilitetin rajonal dhe integrimin evropian.

Këshilli i Europës ka publikuar agjendën e Samitit, që organizohet nga Presidenti i Këshillit Evropian, Antonio Costa dhe Kryeministri i Shqipërisë, Edi Rama.

Sipas agjendës së publikuar bëhet me dije se “udhëheqësit do të takohen fillimisht në një seancë plenare kushtuar sigurisë dhe një vizioni të përbashkët për të  ardhmen e Evropës”. Më pas do të zhvillohen tre tryeza të rrumbullakëta të nivelit të lartë. Tema e takimit është “Evropa e Re në një botë të re: unitet – bashkëpunim – veprim i përbashkët”.

Udhëheqësit pritet të diskutojnë sigurinë e Evropës, duke përfshirë mbështetjen për Ukrainën, mbrojtjen evropiane, mbrojtjen e demokracisë, si dhe përgatitjen dhe aftësinë e reagimit ndaj kërcënimeve të ndryshme.

“Samiti është strukturuar rreth diskutimeve në tri tryeza tematike, përkatësisht: sigurimi i Evropës dhe forcimi i qëndrueshmërisë demokratike, Evropë për 600 milionë qytetarë: rritja e konkurrueshmërisë dhe sigurisë evropiane përmes, inovacionit dhe qëndrueshmërisë, një Evropë e hapur me kufij të sigurt: adresimi i sfidave të lëvizshmërisë dhe nxitja e fuqizimit të të rinjve,” thuhet në njoftimin e Komunitetit Politik Evropian.

Së bashku me Presidentin Costa, BE-ja do të përfaqësohet edhe nga Presidentja e Komisionit Evropian, Ursula von der Leyen dhe Përfaqësuesja e Lartë për Punët e Jashtme, Kaja Kallas.

Rama: Krenarë për emrin e Shqipërisë, që do të shqiptohet në të gjitha gjuhët e botës

Takimi i gjashtë i Komunitetit Politik Evropian do të mbahet në sheshin “Skënderbej”. Me një mesazh simbolik në rrjetet sociale, kryeministri Edi Rama theksoi rëndësinë e këtij momenti, duke iu referuar heroit kombëtar, Gjergj Kastriotit Skënderbeu.

“Më 16 maj të gjithë ata do të mblidhen nga të katër anët e Europës në sheshin tënd o Mbret dhe ne, stërnipërit e tu do të jemi të gjithë krenarë për emrin e Shqipërisë tonë, që do të shqiptohet në të gjitha gjuhët e botës,” shkruan Rama.

/rtsh.al/