Pas tre javësh luftime intensive që shkaktuan një krizë të rëndë humanitare, Tajlanda dhe Kamboxhia kanë arritur sot një marrëveshje për “armëpushim të menjëhershëm”.

Konflikti kufitar, i përqendruar rreth kontrollit të tempujve të lashtë në zonat e diskutueshme, ka lënë pas një bilanc tragjik me të paktën 47 të vdekur dhe ka detyruar zhvendosjen e gati një milion civilëve.

Detajet e marrëveshjes

Sipas dokumentit të përbashkët të nënshkruar nga ministrat e Mbrojtjes të dy vendeve fqinje, armëpushimi ka hyrë zyrtarisht në fuqi sot, më 27 dhjetor 2025.

Kushtet e paktit përfshijnë:

Ndalimin total të zjarrit. Kjo mbulon të gjitha llojet e armëve dhe ndalon sulmet ndaj objektivave ushtarake, civilëve dhe infrastrukturës.

Ngrirjen e trupave, sipas të cilës, ndalohet çdo lëvizje e mëtejshme e forcave ushtarake.

Kthimin e civilëve ku palët bien dakord të lejojnë banorët e zonave kufitare të kthehen në shtëpitë e tyre sa më shpejt të jetë e mundur.

Bashkëpunimin teknik dhe zotim i përbashkët për aktivitetet e çminimit dhe luftën kundër krimit kibernetik.

Presioni diplomatik dhe roli i ASEAN

Ky zhvillim vjen pas tre ditësh negociata intensive, të nxitura nga një takim krize i ministrave të jashtëm të Shoqatës së Kombeve të Azisë Juglindore (ASEAN). Komuniteti ndërkombëtar, përfshirë Shtetet e Bashkuara, Kinën dhe Malajzinë, kishte ushtruar presion të fortë për ndalimin e luftimeve, duke marrë parasysh dështimin e armëpushimit të mëparshëm në korrik, i cili zgjati vetëm pak ditë.

Reagimi i BE-së

Bashkimi Evropian ka reaguar menjëherë përmes Shërbimit të Veprimit të Jashtëm (EEAS). Brukseli e “mirëpret” marrëveshjen dhe u bën thirrje palëve ta zbatojnë atë “me mirëbesim”. BE-ja vlerësoi rolin e ASEAN-it dhe shprehu gatishmërinë për të ofruar mbështetje për të garantuar paqen afatgjatë në rajon.

Tani mbetet për t’u parë nëse ky armëpushim do të respektohet në terren, duke i dhënë fund një prej përshkallëzimeve më të rënda ushtarake në Azinë Juglindore në vitet e fundit.

/rtsh.al/