Ambasada e Shteteve të Bashkuara në Prishtinë ka reaguar ashpër ndaj vendimit të Komisionit Qendror të Zgjedhjeve (KQZ) për të mos miratuar listën e kandidatëve të Listës Serbe. Sipas REL, një zëdhënës i ambasadës tha se ky vendim është në kundërshtim me të drejtën e qytetarëve për të zgjedhur përfaqësuesit e tyre në mënyrë demokratike.

Ai theksoi se çdo veprim që shkel këtë të drejtë e minon partneritetin mes SHBA-së dhe Kosovës- shkruan REL. Më 31 janar, KQZ shpalli rezultatet përfundimtare të zgjedhjeve të 28 dhjetorit, por nuk miratoi listën e kandidatëve të Listës Serbe, parti që ka mbështetje nga Beogradi.

Anëtarët e KQZ-së miratuan të gjitha listat përveç asaj të Listës Serbe. Ky vendim ka nxitur një ankesë nga Lista Serbe në Panelin Zgjedhor, që e ka cilësuar të paligjshëm dhe diskriminues. Kreu i KQZ-së, Kreshnik Radoniqi, e quajti vendimin të pakuptimtë dhe theksoi se afati për ankesa kishte kaluar. 

Ndërkohë, Gjykata Kushtetuese ka sqaruar se nënkryetari i Kuvendit nga komuniteti serb mund të emërohet vetëm nga Lista Serbe, pasi ajo është partia më e madhe në këtë komunitet.

Gazetar: A. Mata

/rtsh.al/