Në katër vjetorin e pushtimit të plotë rus të Ukrainës  Gjermania ka hapur në Berlin një ekspozitë e quajtur “Muzeu i Ukrainës”, brenda “Berlin Story Bunker” – një ish-strehë ajrore naziste nga Lufta e Dytë Botërore, e kthyer sot në muze historik.

Ky konsiderohet muzeu i parë jashtë Ukrainës që i dedikohet posaçërisht luftës së Rusisë kundër Ukrainës.

Ekspozita synon t’u tregojë evropianëve realitetin fizik të luftës, brutalitetin e saj dhe qëndrueshmërinë e ukrainasve, duke nxitur mbështetje të vazhdueshme për Kievin.

Ndër objektet kryesore në ekspozitë janë: Mbetje të dronëve rusë (rreth 20 copë të varur nga tavani, duke përfshirë koleksionin më të madh në botë të dronëve rusë të rrëzuar), fragmente të raketave të lundrimit (si KH-101 ruse), pjesë të tjera nga fronti, përfshirë një automjet evakuimi i shkatërruar nga Khersoni, dëshmi personale nga mbijetues, refugjatë dhe dëshmitarë okularë.

Muzeu ndodhet në një bunker masiv prej 6,500 m² pranë stacionit të vjetër Anhalter Bahnhof. Ekspozita e re zë rreth 300 m² dhe shtohet në koleksionet ekzistuese për nazizmin dhe historinë e Gjermanisë pas 1945-ës.

Sipas kuratorëve, vendosja e kësaj ekspozite në një bunker nazist krijon një paralelizëm historik midis agresioneve të së kaluarës dhe asaj aktuale, duke theksuar rolin e Ukrainës si “mburojë” e Evropës.

Drejtori  i muzeut Enno Lenze dhe kuratori Wieland Giebel kanë thënë se qëllimi është të sillen “realiteti fizik” i luftës tek publiku perëndimor, që shpesh nuk e ka përjetuar drejtpërdrejt.

/rtsh.al/