Vetëm disa orë pas prezantimit të makinës së re elektrike të Ferrarit, “Luce”, rrjetet sociale në Itali shpërthyen me kritika.

Modeli i parë plotësisht elektrik i markës legjendare italiane, i cili kushton 550,000 euro dhe është i pari me pesë vende, ka ndezur një debat të gjerë mes politikanëve, ish-drejtuesve dhe tifozëve tradicionalë të Ferrarit. 

Ministri italian i Transportit, Matteo Salvini, reagoi ashpër në rrjetet sociale duke shkruar,  “Elektrike, jashtëzakonisht e shtrenjtë (550,000 euro!), dhe estetikisht… dizajni flet vetë. Duket si çdo gjë tjetër përveç një Ferrari. A është kjo ajo që supozohet të jetë inovacioni? Pyes veten se çfarë do të thoshte Enzo Ferrari.” 

Kritikat e Salvinit pritet të shtojnë tensionet mes qeverisë italiane dhe familjes Agnelli-Elkann, aksionari më i madh i Ferrarit dhe grupit automobilistik Stellantis. 

Edhe ish-presidenti i Ferrarit, Luca Cordero di Montezemolo, e kundërshtoi modelin e ri. 

 “Ne rrezikojmë të shkatërrojmë një legjendë. Kjo makinë nuk meriton të mbajë logon e Ferrarit, kalin e famshëm që kërcen.” 

Ai shtoi me ironi se,  “Të paktën kjo është një makinë që kinezët me siguri nuk do ta kopjojnë.” 

Nga ana e tij, deputeti i opozitës Carlo Calenda e shfrytëzoi rastin për të kritikuar familjen Elkann-Agnelli, duke i akuzuar për dobësimin e ikonave të industrisë italiane, përfshirë Ferrarin. 

Modeli “Luce”, i cili u zhvillua me ndihmën e ish-drejtorit të dizajnit të Apple, Jony Ive, dhe grupit të tij LoveFrom, është Ferrari i parë me katër dyer dhe pesë vende.

Ai ofrohet në një ngjyrë të pazakontë blu të çelët dhe është përshkruar si “Ferrari më i rehatshëm ndonjëherë”. 

Megjithatë, prezantimi nuk i bindi menjëherë investitorët: aksionet e Ferrarit ranë me mbi 8% të martën. 

Presidenti italian Sergio Mattarella ishte ndër të parët që pa modelin e ri, kur iu prezantua nga kryetari i Ferrarit, John Elkann. 

Ferrari synon me këtë model të tërheqë familje të pasura, duke ofruar hapësirë të bollshme, teknologji të avancuar dhe një bagazh prej 600 litrash.

Dorëzimet e makinës pritet të fillojnë në tremujorin e katërt të vitit 2026. 

Sipas ekspertëve, ky hap i guximshëm vjen në një kohë kur rivalë si Porsche dhe Lamborghini po e zvogëlojnë ambicien për makina elektrike, për shkak të kërkesës së dobët.

“Luce” mbetet një provë e madhe për Ferrarin, një përpjekje për të ruajtur prestigjin e markës, ndërsa përballet me presionin e tranzicionit drejt mobilitetit të gjelbër. 

Ferrari unveiled its first fully electric car, taking a high-stakes leap into EVs even as rivals including Porsche and Lamborghini scale back their ambitions amid weak demand https://t.co/3ntOvBehKz pic.twitter.com/IhBq4zlOLl

— Reuters (@Reuters) May 26, 2026

/rtsh.al/