Studiuesit në University of Cambridge kanë zhvilluar atë që konsiderohet vaksina e parë në botë, përbërësi kryesor i së cilës është projektuar tërësisht nga inteligjenca artificiale.

Vaksina synon të ofrojë mbrojtje kundër të gjithë familjes së koronavirusëve, përfshirë variantet e Covid-19 dhe viruset që mund të kalojnë nga kafshët te njerëzit në të ardhmen. Shkencëtarët përdorën AI për të analizuar kodet gjenetike të koronavirusëve dhe për të krijuar një “super-antigjen”, i cili trajnon sistemin imunitar të njohë dhe luftojë një gamë të gjerë virusesh.

Testet e para te 39 vullnetarë treguan se vaksina është e sigurt, ndërsa një studim më i madh me rreth 200 persona po vazhdon për të vlerësuar efektivitetin e saj.

Sipas profesorit Jonathan Heeney, kjo teknologji mund të ndryshojë rrënjësisht mënyrën se si bota përgatitet për pandemitë e ardhshme, duke kaluar nga reagimi ndaj viruseve ekzistuese në parandalimin e kërcënimeve të reja.

Ekipi po punon gjithashtu në vaksina universale kundër gripit sezonal, gripit të shpendëve H5N1 dhe disa formave të Ebolës. Ekspertët e pavarur e kanë cilësuar qasjen si shumë premtuese, ndërsa inteligjenca artificiale po shihet gjithnjë e më shumë si një mjet revolucionar në zhvillimin e vaksinave.

/rtsh.al/