Presidenti i Shteteve të Bashkuara, Donald Trump, ka deklaruar se Irani po bën “koncesione shumë të mëdha” në kuadër të negociatave në vazhdim midis dy vendeve, duke e cilësuar situatën si një fitore të madhe për SHBA-në.

Në deklarata të shkurtra për gazetarët para një vizite në Senat, Trump tha: “Po fitojmë me diferencë të madhe. Irani po bën koncesione shumë të mëdha”.

Ai shtoi se gjërat po shkojnë “shumë, shumë mirë”, por nuk dha detaje të mëtejshme për natyrën e këtyre koncesioneve apo zhvillimet specifike në bisedime.

Deklaratat e Trump vijnë në mes të një procesi intensiv negociues midis Shteteve të Bashkuara dhe Iranit, i cili ka përfshirë takime të nivelit të lartë, përfshirë ato të udhëhequra nga zëvendëspresidenti JD Vance në një resort në Zvicër.

Negociatat synojnë një marrëveshje për të stabilizuar situatën pas tensioneve të fundit, duke përfshirë çështje si programi bërthamor iranian, sanksionet ekonomike, lirimin e aseteve të ngrira dhe sigurinë e Ngushticës së Hormuzit.

Trump ka bërë të ditur gjithashtu se Irani ka pranuar inspektime të nivelit të lartë bërthamore për një periudhë të gjatë, duke e përshkruar këtë si një sukses të madh.

Megjithatë, media iraniane dhe zyrtarë të Teheranit kanë dhënë versione të ndryshme, duke minimizuar koncesionet e reja dhe duke theksuar se angazhimet janë brenda kufijve të mëparshëm.

/rtsh.al/