Një gjyqtar federal në Uashington ka hedhur poshtë çështjen penalizuese për konspiracion kryengritës kundër anëtarëve të grupit ekstremist “Oath Keepers”, duke mbyllur përfundimisht dosjet e mbetura të hetimit për sulmin e 6 janarit 2021 në Kapitol. Vendimi erdhi pas kërkesës zyrtare të Departamentit të Drejtësisë nën administratën Trump, e cila vitin e kaluar miratoi masa faljeje dhe zbutje dënimesh për personat e dënuar.

Përmes një vendimi të ashpër, gjyqtari i Qarkut Amit Mehta shprehu kundërshtimin e tij të hapur ndaj kësaj lëvizjeje ligjore, por konfirmoi se gjykata nuk ka hapësirë tjetër ligjore përveç pranimit të kërkesës së qeverisë.

Mbyllja e dosjeve dhe reagimi i gjyqësorit

Gjykatësi Mehta, i cili ka kryesuar proceset gjyqësore ndaj udhëheqësve të “Oath Keepers”, theksoi se rrëzimi i dënimeve minon përpjekjet pesëvjeçare të organit të akuzës dhe ligjzbatuesve për të mbajtur përgjegjës personat e përfshirë në ngjarjet e Kapitolit.

“Kjo është e fundit nga ndjekjet penale që kërkon të mbajë përgjegjës ata që janë përgjegjës për ngjarjet e 6 janarit. Ky libër tani është mbyllur. Epilogu i sotëm zvogëlon rëndësinë e asaj dite, denigron punën e prokurorëve dhe oficerëve të zbatimit të ligjit që siguruan këto dënime dhe justifikon aktet kriminale që shkaktuan rrëzimin e një shtylle shekullore të demokracisë sonë — transferimin paqësor të pushtetit presidencial. Gjykata nuk mund të shkruajë një fund tjetër.”, tha Amit Mehta, Gjyqtar i Qarkut Federal.

Zbutja e dënimeve dhe debati politik

Vendimi për të kërkuar rrëzimin e çështjes për konspiracion përfshin edhe themeluesin e grupit, Stewart Rhodes, i cili fillimisht ishte dënuar me 18 vite burgim për rol udhëheqës në ngjarje. Rhodes, i cili u lirua në janar 2025 pas zbutjes së dënimit nga Presidenti Donald Trump, ka pretenduar vazhdimisht pafajësinë e tij, duke e cilësuar veten si “i burgosur politik”.

Mbrojtja e Rhodes reagoi ndaj qëndrimit të gjyqtarit duke e quajtur ndërhyrje personale në procesin ligjor.

“Jemi të zhgënjyer nga përmbajtja e opinionit të gjyqtarit Mehta. Nuk ishte e nevojshme të injektoheshin mendimet e tij personale në një mënyrë të tillë.”, tha James Lee Bright, avokat mbrojtës i Stewart Rhodes

Administrata e Presidentit Trump ka mbrojtur vendimet për falje, duke argumentuar se procedimet e mëparshme ndaj më shumë se 1,200 personave përfaqësonin trajtim të padrejtë nga sistemi i drejtësisë. Përveç lehtësimeve për të dënuarit, u urdhërua gjithashtu pushimi i rreth 450 çështjeve të tjera që ishin ende në proces hetimor apo gjyqësor.

/rtsh.al/