Dy dekada pas ndarjes nga jeta të gazetares dhe shkrimtares së shquar Oriana Fallaci, e cila u shua më 15 shtator 2006, vjen në dritë një nga dëshmitë më intime dhe të pabotuara të periudhës së saj të fundit. Libri i ri me titull “Fuqia e Pasionit – Letra drejtuar Monsinjor Fischella-s”, që pritet të dalë në shitje më 8 shtator nga shtëpia botuese Piemme, zbulon korrespondencën e zhvilluar gjatë një viti e gjysmë të fundit të jetës së saj me Monsinjor Rino Fisichella-n.

Letrat, të ruajtura privatisht për njëzet vjet, hedhin dritë mbi një dialog njerëzor dhe shpirtëror intensiv mes gazetares së sëmurë rëndë dhe figurës së lartë kishtare që u bë kujdestar i mendimeve të saj të fundit.

Një dëshmi e brishtësisë dhe kërkimit shpirtëror

Në shkrimet e dërguara nga Nju Jorku, Fallaci nuk fshihte dot gjendjen e saj të rëndë shëndetësore dhe lodhjen ekstreme nga sëmundja. Më 2 maj 2006, ajo shkruante me sinqeritet tronditës për sfidat e përditshme fizike:

“Deri tani, edhe ndërrimi i shiritit në këtë makinë është bërë një sipërmarrje e mundimshme. Çdo gjë luhatet në një mjegull, dhe madje edhe të qëndruarit ulur më bën të mbetem pa frymë, po mbytem, shembem në shtrat si një dem thertoreje.”

Pavarësisht lidhjes së saj të fortë me kulturën dhe “perëndeshën e arsyes”, miqësia me Imzot Fisichella-n i dha asaj mundësinë e një dorëzimi të plotë dhe të vënies në dyshim të misterit dhe besimit. Në të njëjtën letër të muajit maj, ajo shpreh hapur mirënjohjen e saj për mbështetjen e vazhdueshme shpirtërore:

“Jo, nuk i detyrohem asgjë rrezatimit dhe kimioterapisë. I detyrohem gjithçka asaj jave vere, atyre dy ditëve dimri, asaj dite e gjysmë në pranverë. Je ti që më ndihmove të jetoja. Dhe tani, pasi më ndihmove të jetoja, më ndihmo të vdes.”

Portreti i një gruaje të fortë por të pambrojtur

Nga ana e tij, Imzot Rino Fisichella — aktualisht proprefekt i seksionit për çështjet themelore të ungjillëzimit në botë — kujton në faqet e librit kompleksitetin e kësaj lidhjeje të pazakontë që i dha asaj “atë që nuk e kishte pasur kurrë në jetën e saj”. Duke e përshkruar portretin e saj të vërtetë, ai shkruan:

“Ti je një grua e fortë, inteligjente, por në fund mbetesh një fëmijë i pambrojtur që dëshiron vetëm që dikush t’i mbajë dorën.”

Ky botim premton të pasurojë kuptimin rreth trashëgimisë njerëzore të Oriana Fallaci-t, duke treguar përmes fjalëve të saj dimensionin më të brishtë, por po aq kurioz e kokëfortë, të një prej intelektualeve më të shquara të shekullit të XX.

/rtsh.al/