Misioni iranian pranë Kombeve të Bashkuara ka deklaruar se Kina dhe Rusia e kanë hedhur “me të drejtë” veton ndaj projekt-rezolutës së Këshillit të Sigurimit, të udhëhequr nga SHBA, për zgjatjen e monitorimit të sanksioneve kundër Iranit.

Në një deklaratë të publikuar në X, misioni iranian theksoi se “Këshilli i Sigurimit duhet të mbrojë Kartën e OKB-së” në vend që të shërbejë “interesave të ngushta të atyre që e shkelin atë” gjatë mbledhjes së Asamblesë së Përgjithshme të OKB-së mbi të drejtën e vetos.

“SHBA-ja dhe aleatët e saj perëndimorë nuk kanë asnjë besueshmëri për t’i ligjëruar Iranit mbi mos-përhapjen e armëve bërthamore apo të drejtën ndërkombëtare, ndërkohë që i shkelin të dyja, mbrojnë regjimin izraelit nga përgjegjësia dhe heshtin ndaj arsenalit të tij bërthamor,” thuhet në deklaratën e misionit.

Më herët ishte raportuar se ambasadori amerikan në OKB, Mike Waltz, kishte thënë se ai synon të krijojë “panelin e vet” të ekspertëve për monitorimin e sanksioneve kundër Iranit, pas vetos së Kinës dhe Rusisë.

/rtsh.al/