Autoritetet ligjzbatuese në Brazil kanë nisur një hetim me intensitet të lartë lidhur me vendndodhjen e senatorit të ekstremit të djathtë, Flavio Bolsonaro, pas dyshimeve se ai është larguar nga vendi. Fjalët për një arratisje të mundshme drejt Shteteve të Bashkuara erdhën menjëherë pas humbjes së garës presidenciale përballë rivalit të krahut të majtë, Luiz Inácio Lula da Silva.

Dyshimet u përforcuan pasi për senatorin nuk u parashikua në asnjë dalje publike dhe ai shkeli detyrimet e përcaktuara nga organet e drejtësisë.

Sipas raportimeve mediatike, “Bolsonaro nuk ishte parë që nga e hëna dhe humbi afatin e së martës në mëngjes për t’ia dorëzuar pasaportën e tij policisë federale”, veprim ky që pasoi vendimin e një gjyqtari të Gjykatës së Lartë për anulimin e menjëhershëm të dokumentit të tij të udhëtimit.

Referuar burimeve nga gazeta O Globo, gjatë një takimi konfidencial me rrethin e tij të afërt, politikani “e bëri të qartë se kishte frikë nga arrestimi”.

Rruga e mundshme e lëvizjes së tij ka nxitur pista të ndryshme hetimore në vendet fqinje. Faqja e lajmeve Infobae raportoi se senatori “iku në Argjentinë të hënën në mbrëmje, ku duhej të hipte në një avion privat në Puerto Iguazu me destinacion Shtetet e Bashkuara”, mirëpo mjeti fluturues nuk u ngrit nga pista.

Më tej, rrjeti Todo Noticias pretendon se senatori “kaloi kufirin për në Argjentinë në këmbë , duke braktisur planet për t’u hipur në aeroplan sapo u përhap lajmi për vendndodhjen e tij”.

Pavarësisht pretendimeve të aleatëve të tij të cituar nga Folha de S. Paulo për një udhëtim drejt veriut, mungojnë të dhënat zyrtare në pikat doganore. Mospërputhja e të dhënave ka bërë që “policia federale po përpiqet të verifikojë me autoritetet argjentinase nëse ka ndonjë të dhënë të hyrjes së tij në vend”, meqenëse senatori nuk figuron në kontrollet e rregullta të imigracionit.

Nga ana tjetër, vetë Flavio Bolsonaro ka reaguar përmes një mesazhi me video të publikuar në rrjetet sociale, ku duke komentuar bllokimin e pasaportës deklaroi se: “Nuk kam menduar kurrë të largohem nga vendi”, edhe pse deri më tani nuk e ka pranuar zyrtarisht humbjen zgjedhore ndaj Lula da Silvës.

/rtsh.al/