Bota e komedisë dhe televizionit në Mbretërinë e Bashkuar po përballet me një nga tronditjet më të mëdha të viteve të fundit. Pas dënimit me burg të komedianit dhe aktorit Russell Brand për përdhunim dhe sulme seksuale, vëmendja publike është zhvendosur te bashkëkrijuesi i shfaqjes së njohur “Little Britain” dhe autori i librave për fëmijë, David Walliams, i cili tashmë përballet me akuza të ngjashme për sjellje të pahijshme seksuale.

Pretendimet ndaj Walliams u bënë publike nga The Guardian dhe ITV News, pasi një gjyqtar hodhi poshtë kërkesën e tij për të ndaluar me urdhër gjyqësor publikimin e artikujve hetimorë.

“Walliams, një autor i njohur për fëmijë dhe personalitet televiziv, kishte kërkuar një urdhër gjyqësor për të bllokuar dy organizata lajmesh nga publikimi i akuzave kundër tij. Por një gjyqtar e hodhi poshtë kërkesën e tij javën e kaluar,” bëhet e ditur në raportime, ku përfshihen edhe “rrëfime të hollësishme nga shumë gra rreth sjelljes së tij të supozuar të pahijshme,” mes të cilave edhe akuza nga një grua që pretendoi se u sulmua kur ishte vetëm 15 vjeçe.

Nga ana tjetër, dënimi i i zbatuar ndaj Russell Brand ka shënuar një pikë kthese ligjore e mediatike. Brand, i cili mohoi të gjitha pretencat, u shpall fajtor nga juria për sulmet ndaj katër viktimave.

“Brand mohoi akuzat e gjashtë grave se ai i përdhunoi ose i sulmoi seksualisht, por një juri prej tetë burrash dhe katër grash e shpalli fajtor javën e kaluar për sulmin ndaj katër nga gjashtë akuzueseve. Ai u dënua të hënën me 10 vjet e gjysmë burg për përdhunimin e një gruaje dhe sulmin seksual ndaj tre të tjerave,” konfirmojnë detajet gjyqësore.

Zhvillimet e njëpasnjëshme kanë ngritur pikëpyetje të mëdha mbi përgjegjësinë e kompanive mediatike, si BBC, dhe kulturën që ka mbrojtur figurat publike për dekada me radhë. Në reagim ndaj këtyre zbulimeve, BBC njoftoi se ka hequr nga platformat e saj të gjitha programet e lidhura me Walliams.

Lidhur me mjedisin brenda industrisë dhe nevojën për reforma të thella administrative, Sekretarja e Kulturës në Mbretërinë e Bashkuar, Lisa Nandy, u shpreh me ton kritik për mungesën e ndryshimit përgjatë viteve:

“Akuzat kundër Walliams janë të fundit në një linjë të gjatë abuzimesh të raportuara të pushtetit në një industri ku e kemi ditur prej kohësh se çekuilibrat e pushtetit janë të mëdha. Nuk mund ta shoh se çfarë ka ndryshuar në vitet ndërmjetëse,” deklaroi Nandy për mediat.

Ndërkohë, autoritetet policore njoftuan se hetimet po vazhdojnë, me pritshmërinë që më shumë viktima të mundshme të paraqiten për të dëshmuar pas rënies së imunitetit publik të dy komedianëve.

/rtsh.al/