Qendra Shëndetësore e Torovicës në Lezhë, që u shërben rreth 1 mijë banorëve, paraqitet në gjendje të amortizuar. Lagështira në mure, suvatë e dëmtuara dhe mungesa e kushteve të përshtatshme higjeno-sanitare vështirësojnë ofrimin e shërbimit shëndetësor dhe punën e personelit.

Banorët thonë se kjo situatë vijon prej vitesh dhe shprehen të shqetësuar për kushtet në të cilat marrin shërbimin shëndetësor, duke ngritur pikëpyetje edhe për rrezikun e infeksioneve.

“Vetëm qendër shëndetësorë nuk mund t’i thuash. Është me lagështinë. Është shqetësim për për. Kështu si e keni parë nuk është e mirë. S’ka kurrëfarë lloj kushtesh. Vjen personeli këtu por s’ka ku punon. Shërbimi është i mirë. Faleminderit doktorëve që na kanë shërbyer”, thonë banorët e zonës.

Ndërkohë, rikonstruksioni i Qendrës Shëndetësore të Torovicës pritet të realizohet nga Bashkia Lezhë, përmes donacioneve. Rreth dy vite më parë është ndërhyrë në riparimin e çatisë së godinës, por problematikat e tjera vijojnë të mbeten të pazgjidhura.

/rtsh/