Kryeministri Edi Rama ju ka uruar të gjithë besimtarëve myslimanë në Shqipëri,  që nisin nesër muajin e madhërishëm të Ramazanit.

Përmes një postimi në Facebook Rama uron një muaj me agjërim të pranuar e me lehtësim të bekuar prej ndjesisë së të pasurit të Allahut pranë në krah.

Ndër të tjera, kreu i qeverisë shprehet që ky muaj të shërbejë për unitetin dhe përkushtimin ndaj tjetrit.

“Një kohë reflektimi, dhembshurie e rritjeje shpirtërore nis sonte për besimtarët myslimanë. Sjelltë ky muaj i tyre i shenjtë afrim në besim dhe ndriçim të brendshëm në rrugën e tyre dhe të të gjithëve bashkë, me paqe dhe bekime”, shkruan Rama

Gjithashtu, shkruan Rama, “ushqeftë kjo ngjarje vjetore shpirtin e unitetit dhe përkushtimit ndaj tjetrit, pa dallim e përjashtim, duke pastruar e pasuruar mendjet e zemrat e këtij vendi që sot ka nevojë të rritet dhe ngjitet lart në krahët e të gjithëve”

“Ramazan të paqtë e bujar”, përfundon urimin kryeministri Rama.