Qyteti bregdetar i Vlorës do të jetë një nga 13 qytetet evropiane të përcaktuara si “Qyteti Evropian i Sportit për Vitin 2024”. 

Menjëherë pasi fitoi këtë titull, Bashkia e Vlorës ka nisur punën për përgatitjen e terreneve të përshtatshme si dhe planifikimin e aktiviteteve të ndryshme sportive që pritet të ketë një ndikim të madh edhe në promovimin e qytetit.

Në këtë kuadër, Kryetari i Bashkisë së Vlorës, Ermal Dredha, duke ndjekur ritmin e veprimtarive sportive që do të organizohen për gjatë gjithë vitit, ka organizuar gjithë strukturat e këtij institucioni  për mbarëvajtjen e aktiviteteve, që asgjë mos ti mbetët rastësisë.  

“Ritmi i veprimtarive për Vitin e Qytetit Evropian të Sportit e bën të domosdoshme të përshtatemi me një frymë të re pune, në çdonjërin prej sektorëve të Bashkisë Vlorë” shprehet Dredha.

Sipas tij, Vlora nuk ka kohë për të humbur dhe se këto mbledhje bëhen që gjithë strukturat të jenë të koordinuar me njëra tjetrën.

“Duhet të bëhet praktika jonë e përditshme e shërbimeve, zhvilluam një mbledhje bashkërendimi  me drejtoritë tona kryesore, ku secili u njoftua mbi kalendarin e ngjarjeve sportive të planifikuara dhe me përgjegjësitë përkatëse. Është e qartë se Vlora ka një mundësi të madhe përpara  dhe ne nuk kemi kohë për të humbur”, shprehet Dredha.

Marrja e këtij titulli synon që Vlora të angazhohet për të qenë një qytet sa më i rëndësishëm, dinamik dhe gjithëpërfshirës që përqafon shëndetin, duke nxitur pjesëmarrjen në aktivitetet sportive.

“Qyteti Evropian i Sportit për Vitin 2024” është dhe një mundësi e mirë e qyteteve fituese për të paraqitur projekte dinjitoze e për të marrë fonde nga organizatat ndërkombëtare, për zhvillimin e sportit.

/rtsh.al/