4 infermierë janë në hetim në gjendje të lirë pasi akuzohen se kanë hedhur mbetjet spitalore në ambiente të papërshtatshme në kundërshtim me ligjin.

Nën hetim janë vënë M. B., 30 vjeç, Sh. G., 39 vjeçe, G. H., 28 vjeçe dhe A. S., 33 vjeçe, të katërt me detyrë infermier në spitalin e Delvinës dhe do të përballen me akuzat për veprat penale “Shpërdorim i detyrës” dhe “Menaxhimi i mbetjeve”.

“Ndaj këtyre shtetasve nisi procedimi penal pasi falë bashkëpunimit me gazetarët e emisionit investigativ “Stop”, në TV Klan, shërbimet e Komisariatit të Policisë Delvinë kanë konstatuar se në ambientet e brendshme të spitalit të Delvinës, ku këta shtetas punojnë, ishte hedhur mbetje spitalore, në kundërshtim me ligjin”, thuhet në njoftimin e policisë.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme.  

/rtsh.al/