Një zjarrvënie e qëllimshme është regjistruar të dielën në pyllin me pisha në malin Partizan në Berat. Autorë të kësaj ngjarje të rëndë, siç shihet edhe nga pamjet e regjistruara nga kamerat, janë 2 të rinj, të cilët lëviznin me motor.

Ata, qetësisht, kanë ndezur zjarrin pranë pishave dhe janë larguar me mjetin me të cilin po udhëtonin. Nga pamjet shihet qartë se 2 të rinjtë e kanë vënë zjarrin qëllimisht.

Është dashur alarmi i dhënë nga një biznes aty pranë që në vendngjarje të mbërrijë zjarrfiksja, e cila edhe me ndihmën e banorëve të zonës, ka arritur ta verë zjarrin nën kontroll dhe më pas ta fikë.  Paraprakisht mësohet se janë djegur 50 m2 me shkurre e ferra, si dhe janë përzhitur 20 rrënjë pisha.

Policia informon se po punon për identifikimin e 2 të rinjëve që për pak do të shkaktonin një zjarr masiv me pasoja të rënda për të gjithë zonën.

/rtsh.al/