Tridhjetë drejtues automjetesh janë prangosur vetëm në Tiranë, nga janari deri në mes të muajit gusht, pasi janë konstatuar duke qarkulluar në rrugët e kryeqytetit nën efektin e lëndëve narkotike.

Policia Rrugore, duke u bazuar në këto rezultate,  vijon kontrollet e dedikuara, për evidentimin dhe ndëshkimin e shkelësve të rregullave të qarkullimit që janë rrezik potencial për përfshirje në ngjarje rrugore.

Kontrollet në terren bëhen nga Shërbimet e Policisë Rrugore dhe ato të Forcës së Posaçme Shqiponja.

Aparati AquilaScan, iu dha efektivëve rrugor në të gjithë vendi në prillin e vitit të shkuar, me qëllim identifikimin e drejtuesve të automjeteve që qarkullojnë në rrugët e vendit nën efektin e lëndëve psikotrope.

Të rinjtë rezultojnë si përdoruesit më të shpeshtë të lëndëve narkotike gjatë drejtimit të automjeteve, duke u bërë shkak për aksidente fatale në rrugët e vendit.

Pajisja aquilascan është një pajisje e thjeshtë që funksionon përmes mostrave të pështymës, pas analizimeve të të cilave, efektivi dokumenton nëse drejtuesi i mjetit ka konsumuar apo jo lëndë narkotike gjatë drejtimit të mjetit.

Pajisja drogë-testuese në më pak se 3 minuta është në gjendje të identifikojë dhe llojin e lëndës narkotike që mund të ketë konsumuar drejtuesi automjetit.

Gazetare: Flutura Tota 

/rtsh/