Një listë e re e vendeve të sigurta të origjinës e publikuar nga Belgjika e ka vënë Shqipërinë në këtë hartë. Lista ka efekt mbi procedurën e ankimimit në Këshillin për Çështjet e Ligjeve për të Huajt ose e njohur si praktika për azilantët.

Për Belgjikën, vendi i origjinës mund të konsiderohet i sigurt nëse në përgjithësi dhe vazhdimisht nuk ka persekutim ose rrezik për të pësuar dëme serioze. Për përcaktimin e sigurisë së një vendi, merren parasysh gjendja ligjore, zbatimi i ligjit dhe kushtet e përgjithshme politike në vend.

Ndërsa vendimi është marrë në prill, fillimi i korrikut ka shënuar hyrjen në fuqi pa botimit në Gazetën Zyrtare të Belgjikës.

Bashkë me Shqipërinë vende të sigurta të origjinës konsiderohen edhe, Bosnja dhe Hercegovina, Republika e Maqedonisë së Veriut, Kosova, Mali i Zi, Serbia dhe India.

Kjo listë rishikohet të paktën një herë në vit dhe mund të përditësohet në bazë të situatës më të fundit në vend.

Për qytetarët e një vendi që figuron në listën e vendeve të sigurta të origjinës, vlen prezumimi se mbrojtja ndërkombëtare nuk është e nevojshme.  Prandaj, azilkërkuesit nga ato vende duhet të paraqesin artikuj që tregojnë qartë se në rastin e tyre, vendi i tyre nuk mund të konsiderohet i sigurt.

Si rezultat, barra e provës i mbetet azilkërkuesit.

Gazetare: Entela Komnino

/rtsh/