Policia e Pogradecit ka kryer një operacion në përfundim të të cilit ka sekuestruar një arsenal armësh dhe municioni luftarak. Operacioni u zhvillua pas hetimeve disajavore nga uniformat blu të Pogradecit, falë edhe burimeve inteligjente, për goditjen e veprimtarisë kriminale në fushën e armëmbajtjes pa leje.

“Vihet në pranga 40-vjeçari, A. J., banues në fshatin Starovë, me precedent të mëparshëm penal në fushën e prodhimit dhe shitjes së narkotikëve, që posedonte arsenalin e armëve dhe municionit luftarak. Sekuestrohen një mitraloz i lehtë; një armë zjarri tip automatik; dy pushkë gjysmëautomatike; një sasi e konsiderueshme municioni luftarak; krëhëra të armëve të zjarrit; 1 gjerdan mitralozi me 30 fishekë; një granatë dore ofensive dhe pjesë të lëvizshme të pushkës, të cilat dyshohet se ky shtetas do t’i trafikonte në drejtim të Maqedonisë së Veriut.”- thuhet në njoftimin e policisë.

/rtsh.al/