Ministrja e Arsimit, Evis Kushi ka miratuar këtë të premte (30 qershor) udhëzimin për Procedurat e Aplikimit dhe Regjistrimit në Institucionet e Arsimit të lartë, ku bën me dije edhe risitë për vitin e ardhshëm akademik 2023-2024.

Kushi sqaron se raundi i regjistrimit do të ulet nga 3 në 2, çka do të shkurtojë kohëzgjatjen e procedurave për aplikim dhe regjistrim në universitete.

Po ashtu, Kushi theksoi se viti i ardhshëm akademik do të fillojë më 2 tetor 2023 dhe shkurtimi i një raundi është në funksion të fillimit të procesit të mësimdhënies.

“Sot miratova  Udhëzimin për Procedurat e Aplikimit dhe Regjistrimit në Institucionet e Arsimit të lartë, ku kemi sjellë disa risi për vitin e ardhshëm akademik 2023-2024:

 Ulja e numrit të raundeve të regjistrimit nga 3 në 2 shkurton kohëzgjatjen e procedurave për aplikim dhe regjistrim në universitete. Viti i ardhshëm akademik do të fillojë më 2 tetor 2023 dhe shkurtimi i një raundi është në funksion të fillimit të procesit të mësimdhënies.

Pas raundit të dytë, në programet e studimit ku kanë mbetur kuota të lira pranimi, kandidatët që kanë aplikuar në U-albania mund të vijojnë të regjistrohen drejtpërdrejtë në IAL deri në plotësimin e gjitha kuotave.

 Procedura të barabarta aplikimi dhe regjistrimi për të gjithë kandidatët me diplomë të huaj të shkollës së mesme, pavarësisht nëse janë shqiptarë apo të huaj.

 Kandidatët e regjistruar me diplome të huaj kanë detyrim njohjen dhe njehsimin e diplomës brenda datës 30 prill të vitit akademik vijues, për t’u pajisur me numër matrikullimi përpara fillimit të sezonit të dytë të provimeve.

 Ulja e numrit të dokumenteve të nevojshme lehtëson procedurat për regjistrimin e kandidatëve në IAL”, shkruan Kushi.

/rtsh.al/