Alexey Smaznov, kapiteni i cisternës së naftës “Grace Felix” që u bllokua disa ditë më parë në Portin e Durrësit pasi po transportonte  22.500 ton naftë kontrabandë, është arrestuar. Nëpërmjet një njoftimi, Policia bën me dije se 47-vjeçari Smaznov akuzohet për veprat penale “Kontrabanda me mallrat për të cilat paguhet akcizë” dhe “Tregtimi dhe transportimi i mallrave që janë kontrabandë”.

Janë publikuar edhe pamjet e momentit të arrestimit të tij, teksa është sekuestruar sasia e naftës së kontrabanduar dhe anija që e transportonte atë.

Më 19 shkurt, në kuadër të operacionit “Embargo”, Policia bllokoi një anije me flamur liberian, e cila transportonte 22 500 tonë naftë, me dokumentacion të falsifikuar, ndërsa nafta e kishte origjinën nga vendet me embargo dhe ishte e kontrabanduar.

Në vijim të veprimeve procedurale, Policia sekuestroi anijen dhe dokumentacionin e lundrimit të kapitenit, si dhe bllokoi ekuipazhin që përbëhej nga 22 shtetas.

Në drejtimin e Prokurorisë, po vijojnë hetimet e thelluara, me qëllim dokumentimin e plotë të kësaj veprimtarie të kunndërligjshme, si dhe për identifikimin e personave fizikë apo juridikë të përfshirë në këtë rast.

/rtsh.al/