Shqipëria do të bashkëpunojë me Agjencinë Japoneze të Bashkëpunimit Ndërkombëtar (JAICA), për projekte në zonat e mbrojtura si dhe në fushën e turizmit.

Ministrja e Turizmit dhe Mjedisit, Mirela Kumbaro në një postim në rrjetet sociale ka bërë të ditur detaje nga takimi i zhvilluar me përfaqësues të kësaj Agjencie në nisje të vizitës zyrtare në Tokyo.

Ministrja shprehet se në takimin me drejtuesit e Agjencisë Japoneze të Bashkëpunimit Ndërkombëtar, u diskutua për projekte të rëndësishme për zonat e mbrojtura, konkretisht në lagunat dhe parqet kombëtare.

Zonja Kumbaro thekson se dhe turizmi zë një vend kryesor në bashkëpunimin mes dy vendeve dhe dakordësuam të bashkëpunojmë në këtë sektor.

Kumbaro është pjesë e delegacionit të kryesuar nga kryeministri Edi Rama në vizitën zyrtare në Japoni deri në 25 Shkurt në kuadër të 42 vjetorit të vendosjes zyrtare të Marrëdhënieve Diplomatike Shqipëri-Japoni.

/ rtsh.al /