Bashkimi Evropian dhe 16 vende vende të tjera bënë thirrje të hënën (4 mars) që Rusia të lejojë një hetim të pavarur ndërkombëtar për vdekjen e papritur të liderit të opozitës ruse Aleksei Navalni (o. Alexei Navalny). 

Thirrja erdhi nga ambasadorja e BE-së në Këshillin e Kombeve të Bashkuara për të Drejtat e Njeriut në Gjenevë, Lote Knudsen, në emër të 27 shteteve anëtare dhe 16 vendeve të tjera, përfshirë Kanadanë, Mbretërinë e Bashkuar, Shtetet e Bashkuara dhe Ukrainën.

“Jemi të indinjuar nga vdekja e politikanit të opozitës ruse, Aleksei Navalni, për të cilin përgjegjësia përfundimtare bie mbi presidentin [Vladimir] Putin dhe autoritetet ruse,” tha znj. Knudsen.

“Rusia duhet patjetër të lejojë hetim të pavarur dhe transparent ndërkombëtar të rrethanave të vdekjes së tij të papritur,” shtoi ajo.

47-vjeçari Navalni, kritiku i ashpër i presidentit Putin brenda Rusisë, ndërroi jetë më 16 shkurt në një koloni penale në Arktik, ndërsa mbështetësit e tij thanë se ai ishte vrarë.

Kremlini ka mohuar çdo përfshirje të shtetit rus në vdekjen e Navalnit, i cili të premten u përcoll për në banesën e fundit në Moskë.

Komiteti Hetues i Rusisë thotë se ka nisur hetimin për vdekjen e Navalnit, ndërsa Kremlini ka thënë se nuk i përgjigjet kërkesave të Bashkimit Evropian. 

Gazetare: Vjollca Zharri

/rtsh.al/