SHBA-ja ka miratuar planet për një seri sulmesh ndaj objektivave iraniane në Siri dhe Irak. Kjo u bë e ditur nga zyrtarë amerikanë, të cilët ia pohuan këtë partnerit amerikan të BBC-së, CBS News.

Sulmet do të zhvillohen gjatë një numri ditësh, thonë zyrtarët, dhe kushtet e motit duket se do të diktojnë kur ato do të fillojnë. Vendimi vjen pasi një sulm me dron vrau tre ushtarë amerikanë në Jordani, pranë kufirit me Sirinë, të dielën.

Shtetet e Bashkuara kanë fajësuar një grup milicie të mbështetur nga Irani për sulmin. Rezistenca Islamike në Irak – e cila besohet se përmban milici të shumta që janë armatosur, financuar dhe trajnuar nga forcat e Gardës Revolucionare të Iranit – kishte thënë se ishte përgjegjëse për sulmin. Irani ka mohuar çdo rol në sulmin që plagosi 41 trupa të tjera amerikane në bazën ushtarake.

Ndërsa zyrtarët amerikanë janë zotuar t’i përgjigjen sulmit me dron, presidenti Joe Biden dhe zyrtarë të tjerë kanë thënë se vendi nuk po kërkon një luftë më të gjerë me Iranin.

Disa grupe të mbështetura nga Irani kanë shtuar sulmet ndaj entiteteve të lidhura me SHBA-në dhe Izraelin që nga fillimi i luftës Izrael-Hamas më 7 tetor.

Huthët e mbështetur nga Irani në Jemen, për shembull, kanë sulmuar anijet në Detin e Kuq dhe Gjirin e Adenit, duke sjellë si reagim sulme nga SHBA dhe aleatët e saj.

Një zyrtar i mbrojtjes amerikane i tha CBS se një dron u rrëzua gjatë natës në Gjirin e Adenit, ndërsa një dron detar pa pilot u godit dhe u shkatërrua në Detin e Kuq.

Trupat e tre ushtarëve amerikanë të vrarë në sulm pritet të riatdhesohen në një bazë të Forcave Ajrore të Delaware të premten. Shtëpia e Bardhë ka njoftuar se Presidenti Biden do të marrë pjesë në ceremoninë e varrimit. BBC

/rtsh.al/