Një projektligj që do të mbajë të financuar Qeverinë Amerikane deri më 17 nëntor, por në të cilin nuk përfshihet mbështetja e re për Ukrainën, u miratua në Senat me 88 vota pro dhe 9 kundër, duke shmangur mbylljen e qeverisë federale. 

Propozimi u bë nga kryetari i Dhomës së Përfaqësuesve, Kevin Mekarti, i cili u përball me kundërshtime të mëdha nga ligjvënësit e ekstremit të djathtë brenda partisë së tij.

Republikanët në Dhomën e Përfaqësuesve miratuan një financim të përkohshëm, i cili do ta mbajë Qeverinë të hapur deri në mes të muajit nëntor.

Presidenti Xho Bajden e nënshkroi marrëveshjen duke e kthyer në ligj pak para se të skadonte afati në mesnatë. Kreu I Shtëpisë së Bardhë e cilësoi si një lajm të mirë për popullin amerikan.

Nëse do të ndodhte mbyllja e qeverisë amerikane, nga 1 tetori dhjetëra mijëra punonjës federalë do të shkonin në pushime pa pagesë dhe njëkohësisht do të pezulloheshin shërbime të ndryshme qeveritare.

Gazetare V. Zharri

/RTSH/