Greqia ka paralajmëruar Shqipërinë për përkeqësim të marrëdhënieve dypalëshe në rastin e shkarkimit të mundshëm të kryetarit të zgjedhur të Bashkisë së Himarës, Fredi Beleri, i cili prej 12 majit ndodhet në paraburgim.

Ministri i Jashtëm grek, Giorgos Gerapetritis, e konsideron të paligjshëm paraburgimin e Belerit. Ai shtoi se qeveria greke që në momentin e parë të arrestimit të Belerit ka ndërmarrë një sërë nismash jo vetëm për lirimin, por edhe për betimin e tij.

“Me mënyrën se si funksionon, pala shqiptare ka të ngjarë të dëmtojë veten,” vuri në dukje ministri.

Gerapetritis paralajmëroi se shkarkimi i Belerit nga pozicioni i kryetarit të zgjedhur të Bashkisë Himarë do të sillte një përkeqësim serioz të marrëdhënieve greko-shqiptare.

Sipas ministrit grek: “Nuk ka mundësi që të vazhdojë anëtarësimi i Shqipërisë në BE kur ka një shkelje të tillë të shtetit të së drejtës dhe të prezumimit të pafajësisë së Fredi Belerit për të arritur në përfundimin se tensioni i krijuar nuk është aspak i dobishëm për vendin fqinj.”

Beleri u arrestua më 12 maj, ndërsa hetimet ndaj tij kishin nisur ditë më parë pasi policia e Vlorës, e mbështetur me pamje filmike dhe përgjime nga një agjent i infiltruar, regjistroi momentin kur bashkëpunëtorët e Belerit ofruan para në këmbi të votave.

Në zgjedhjet e 14 majit Beleri kandidonte nën siglën e koalicionit “Bashkë Fitojmë”.

Ai e fitoi Bashkinë Himarë përballë Jorgo Goros me një diferencë prej 19 votash.

/rtsh.al/