“Ekziston plan i qartë dhe i përkushtuar për de-përshkallëzimin e situatës në Kosovë”, kështu ka deklaruar presidentja e Komisionit Evropian, Ursula Von der Leyen për Tanjug.

Sipas saj, ka një udhërrëfyes në të cilin të dyja palët kanë punuar në fillim të këtij viti, të cilit duhet t’i përmbahen.

“Unë u bëj thirrje të dyja palëve të de-përshkallëzojnë dhe t’i përmbahen udhërrëfyesit. Kjo është absolutisht thelbësore për të ecur përpara në mënyrë paqësore”, tha presidentja e KE kur u pyet se si do ta komentonte situatën në veri të Kosovës dhe nëse BE-ja do të angazhohet më fuqishëm dhe do të ndikojë që kryeministri i Prishtinës, Albin Kurti, të pranojë planin e BE-së për deeskalimin e situatës dhe tërheqjen e njësive speciale.

Në prag të ditës së dytë të samitit të NATO-s në Vilnius, Von der Leyen theksoi se është e qartë se Beogradi dhe Prishtina duhet të respektojnë atë që është rënë dakord në Ohër.

/rtsh.al/