Ish-presidenti i Shteteve të Bashkuara të Amerikës, Donald Trump ka reaguar përmes rrjetit social “Truth” teksa ishte duke shkuar për t’u paraqitur në zyrën e prokurorit të Manhatanit dhe pritet të dalë para gjykatës.

Trump e ka cilësuar gjithçka si surreale, madje duke thënë se do ta arrestojnë siç edhe ndodhi sipas procedurës.

“Duke u nisur për në Manhatanin e Poshtëm, për në Gjykatë. Duket kaq sureale Wow, ata do të më arrestojnë. Nuk mund të besohet se kjo po ndodh në Amerikë!”, shkruan Trump, transmeton CNN. 

Ish-presidenti Donald Trump është arrestuar përpara se të dalë në gjyq për t’u njohur me akuzat që rëndojnë ndaj tij.

Ai ka mbërritur në zyrën e prokurorit të qarkut të Manhattanit ku edhe është arrestuar. Tashmë ai ndodhet në paraburgim policor përpara se të dalë para gjykatës.

Trumpit pritet t’i merren gjurmët e gishtërinjve si pjesë e arrestimit, megjithëse është ende e paqartë nëse do të fotografohet, transmeton CNN.

Më pas, ai do të sillet në gjykatë. Ky do të jetë proces i shpejtë dhe rutinë, por që përfaqëson një moment surreal dhe historik në historinë e SHBA-ve. 

/rtsh.al/